Ish-kryeministri Sali Berisha u përfshi në replika me Elisa Spiropalin, ministre shteti për marrëdhëniet me parlamentin. Në seancën e sotme, fillimisht Berisha kishte një “thes” me akuza për ministrat e rinj, Arbi Mazniku dhe Albana Koçiu, e cila ndërsa ish-kryeministri e akuzonte se kishte dalë në përgjime, vetëm qeshte pas krahëve të tij.
Më pas iu kthye Elisa Spiropalit, e cila pak ditë më parë i tha “O Sali, shih gjej ndonjë kurë për ankthet e tua, se për mua edhe 100 vjet të rrëmosh nëpër skuta e nëpër zgëqe, noc rrokun do gjesh”.
“Elisa ke përdorur një term jo të fisshëm, unë nuk merrem me këtë pasi ti kërkon që unë të bie në vulgaritet por unë nuk bie. Frojdi në klasifikimin e zhvillimit psiko-seksual ka gjetur se ky zhvillim kalon në pesë stade.
Stadi i tretë është stadi “falik”, i cili shfaqet në moshën 3-5 vjeç, shumica e kalojnë, disa mbeten dhe disa i krijohet kompleksi i Edipit. Elisa ky kompleks i stadit të tretë u ndodh edhe vajzave që Frojdi e quan “zilia falike” tek vajzat” i tha Berisha.
Ndërhyri Lindita Nikolla për të mbrojtur Spiropalin. “Një fjalor aspak etik” tha ajo. Më pas i dha fjalën ministres. “Doktor kush të mori me qira sot. Nga njëri tek tjetri.
Tani je kthyer në një dyfekxhi me qira nga njëri tek tjetri dhe të hedhin edhe ndonjë “kockë” për t’u marrë me njërin dhe tjetrin.
Por unë ta kuptoj edhe moshën edhe hallin. Është e paimagjinueshme që një gjysh që duhet të ishte i mbyllur me turp në shtëpi, del dhe përmend jo Frojdin, por problemet e tij të rënda” tha ajo.
