Në qytetin e Durrësit u zhvillua një ceremoni përkujtimore në kuadër të “Vitit Mbarëkombëtar të 80-vjetorit të Çlirimit” dhe në 15-vjetorin e rënies në krye të detyrës të punonjësve të Policisë së Shtetit, të shpallur “Dëshmorë të Atdheut”, Altin Dizdari, Fatos Xhani, Kastriot Feska dhe Saimir Duçkollari.
Në ceremoni morën pjesë zv/ministri i Brendshëm, Andi Mahila, Drejtori i Përgjithshëm i Policisë së Shtetit, Drejtues Madhor Muhamet Rrumbullaku, drejtues të pushtetit vendor, familjarë të Dëshmorëve të Atdheut, si dhe kolegë të të rënëve dhe punonjës të Policisë së Shtetit.
Këshilli bashkiak me propozim të bashkisë së Durrësit ka vendosur emërtimin e rrugës “Dëshmorët e Policisë” dhe në nderim të tyre u përurua memorali, vepër e skulptorit Ardian Pepa realizuar nën kujdesin e Drejtorisë Vendore të Policisë Durrës.
