Mediat e mëdha ndërkombëtare po i bëjnë jehonë zgjedhjeve të mbajtura një ditë më parë në Himarë.
Gazeta amerikane ‘Washington Post’ shkruan se zgjedhjet u zhvilluan pas largimit të Fredi Belerit, një rast që ka ndezur tensionet me Greqinë.
“Rezultatet paraprake të hënën treguan se kandidati i Partisë Socialiste të Shqipërisë në pushtet, Vangjel Tavo, fitoi zgjedhjet për kryebashkiak në qytetin jugperëndimor të Himarës, pasi kryetari i mëparshëm u shkarkua në një rast që ka ndezur tensionet me Greqinë.
Rezultatet në Komisionin Qendror të Zgjedhjeve treguan se Tavo fitoi 58.62% të votave të së dielës, ndërsa 41.38% shkuan për Petraq Gjikurian nga koalicioni ‘Bashkë fitojmë’ që përfshin Partinë Demokratike të qendrës së djathtë të opozitës kryesore të ish-kryeministrit Sali Berisha dhe Partinë e Lirisë të ish-presidentit Ilir Meta.
Zgjedhjet e parakohshme u mbajtën në Himarë, 220 kilometra në jugperëndim të kryeqytetit, Tiranë, pasi kryebashkiakut të mëparshëm, Fredis Beleri iu hoq titulli, u dënua dhe u burgos për akuzat e blerjes së votës. Ai dhe Greqia fqinje kanë pretenduar se dënimi i tij ishte i motivuar politikisht. Zyrtarët shqiptarë i kundërshtojnë me forcë këto pretendime, duke përmendur pavarësinë e gjyqësorit,” raporton gazeta.
Edhe kjo media e vë theksin te skandali i mohimit të të drejtës së votës për 6 mijë zgjedhës.
“Opozita u ankua se rreth 6.000 njerëz nuk ishin në gjendje të votonin për shkak të kartave të identitetit të skaduar. Gjatë zgjedhjeve të mëparshme, komisioni lejoi personat me letërnjoftime të vjetruara të votojnë me kërkesë të disa partive politike dhe me një vendim të qeverisë. Këtë vit nuk është paraqitur një kërkesë e tillë, sipas kreut të KQZ-së, Ilirjan Celibashi”.
“Beleri, 51 vjeç, ka pretenduar se çështja kundër tij ishte një përpjekje e kryeministrit të Partisë Socialiste Edi Rama për të mbajtur kontrollin e Himarës dhe potencialin e saj për zhvillim fitimprurës të pronës në të ardhmen. Në qershor, Beleri u zgjodh në Parlamentin Evropian me partinë qeverisëse konservatore të Greqisë dhe iu dha një leje pesë-ditore nga burgu për të marrë pjesë në seancën e hapjes së parlamentit në Strasburg”.
