Sekretarja e Përgjithshme e Partisë Demokratike të Kosovës (PDK), Vlora Çitaku, në konferencën e saj të fundit për media, vlerësoi se pjesëmarrja e qytetarëve në votime është e kënaqshme dhe se mbështetja për PDK-në po rritet në mënyrë të dukshme. Ajo konfirmoi se shumica e komunave që po shkojnë në zgjedhje pa balotazh janë të Partisë Demokratike të Kosovës.
Çitaku theksoi se raportet nga terreni janë shumë pozitive, me PDK-në që prin bindshëm në shumë komuna falë përkushtimit dhe besimit të qytetarëve. Ajo i bëri thirrje qytetarëve që ende nuk e kanë ushtruar të drejtën e tyre të votës, ta bëjnë këtë deri në orën 19:00.
Ajo u apeloi qytetarëve të dalin dhe të votojnë për komunat dhe lagjet e tyre, duke theksuar rëndësinë e votës për punë dhe dinjitet. “Besimi që po ndiejmë sot në terren është i jashtëzakonshëm. Jemi të bindur se mbrëmja e sotme do të sjellë lajme të mira për PDK-në,” u shpreh Çitaku.
Ajo përfundoi duke falenderuar qytetarët për besimin dhe pjesëmarrjen e tyre në këtë proces, duke nënvizuar se çdo votë ka rëndësi për të ardhmen që ndajnë të gjithë. Çitaku e mbylli konferencën duke shprehur besimin se PDK do të fitojë mbështetje të mëtejshme nga qytetarët e Kosovës.
