Kryeministri në detyrë i Kosovës, Albin Kurti, ka reaguar pas përfundimit të procesit të votimit për zgjedhjet lokale. Në një postim në rrjetet sociale, ai ka shprehur mirënjohjen e tij për qytetarët, të cilët, sipas tij, dëshmuan kulturë demokratike gjatë ditës së zgjedhjeve.
Kurti ka theksuar rëndësinë e procesit të numërimit të votave dhe ka bërë thirrje që kujdesi për votat e qytetarëve të ruhet. “Sot, me qetësi e maturi, qytetarët e Kosovës dëshmuan edhe njëherë kulturën demokratike duke kaluar ditën e zgjedhjeve lokale me dinjitet e përgjegjësi,” ka thënë ai.
Kryeministri ka falënderuar gjithashtu qytetarët për mbështetje ndaj Lëvizjes VETËVENDOSJE! dhe kandidatëve të saj nëpër komuna. Ai e sheh këtë besim si një forcë për vazhdimin e angazhimit dhe punës përpara.
Më tej, ai ka theksuar se tani është koha për komisionerët dhe vëzhguesit, të cilët kanë një rol kyç jo vetëm në numërimin e votave, por edhe në ruajtjen e vullnetit të qytetarëve që u shpreh në këto zgjedhje.
