Me qëllim garantimin e rendit dhe sigurisë gjatë zgjedhjeve të pjesshme, Drejtoria e Përgjithshme e Policisë së Shtetit ka hartuar një plan masash të detajuar. Kjo përfshin ruajtjen e objekteve zgjedhore dhe parandalimin e krimeve zgjedhore, në përputhje me ligjin “Për Policinë e Shtetit”.
Në pesë bashkitë ku do të zhvillohen zgjedhjet, Policia e Shtetit ka marrë në ruajtje 9 objekte për komisionet e KZAZ-ve dhe do të marrë 473 objekte si qendra votimi ditën e shtunë. Një listë me 612 punonjës policie dhe automjete, të angazhuar për ruajtjen e objekteve dhe shoqërimin e materialeve, është dërguar dhe miratuar nga KQZ.
Punonjësit e Policisë do të instruohen ditën e shtunë për të siguruar qendrat e votimit, ku do të shpërndahen për shërbimin e nevojshëm. Në ditën e votimit, për çdo kërkesë për ndërhyrje, Policia do të veprojë në përputhje me Kodin Zgjedhor, duke ruajtur kontaktin me komisionet e votimit.
Më 09.11.2025, në orën 18:00, Policia do të marrë në ruajtje objektet e VNV-ve për numërimin e votave dhe do të vazhdojë shërbimin deri në përfundim të procesit. Janë krijuar grupe të gatshme në çdo komisariat dhe drejtori për çdo nevojë operative.
Punonjësit e angazhuar janë të trajnuar dhe të pajisur me identifikim dhe uniforma të Policisë. Strukturat e posaçme hetimore të Policisë do të jenë në terren për të monitoruar dhe goditur çdo tentativë për manipulim të votës.
Një grup koordinimi është ngritur në Drejtorinë e Përgjithshme të Policisë për të mbikëqyrur procesin zgjedhor. Policia e Shtetit është e angazhuar për të siguruar zhvillimin e qetë të zgjedhjeve, duke ndihmuar qytetarët të ushtrojnë të drejtën e tyre për të votuar në siguri.
Apelohet për qytetarët që të denoncojnë çdo rast që dëmton të drejtën e tyre për votim dhe për subjektet politike që të respektojnë ligjin dhe të bashkëpunojnë me Policinë për të ruajtur mbarëvajtjen e procesit zgjedhor.
