Detaje të reja janë zbardhur në lidhje me hetimin e nisur ndaj kryebashkiakut të Rrogozhinës, Edison Memolla. Mësohet se Memolla është nën akuzë për blerje votash, në lidhje me zgjedhjet e pjesshme të 6 marsit 2022.
SPAK po heton një audipërgjim, ku zbulohet se Memolla paguante faturat e energjisë elektrike të qytetarëve të Rrogozhinës në këmbim të votave.
Regjistrimi i bisedës telefonike raportohet se është bërë në prag të zgjedhjeve të pjesshme, ku Memolla dyshohet se ka ndërhyrë tek OSHEE-ja për të mos i ndërprerë energjinë elektrike një familjeje të varfër. Në një bisedë telefonike me një grua, Memolla konfirmon se ishte takuar më herët me telefonuesen, së cilës i kishte garantuar mosndërprerjen e energjisë, në këmbim të votës.
Përveç bisedës me gruan, Memola flet edhe me një elektriçist, i cili kishte shkuar në shtëpinë e familjes për t’i prerë energjinë elektrike, për shkak të faturave të prapambetura. Memola e orienton elektricistin që ta priste lidhjen pasi të kalojnë zgjedhjet.
Të gjitha këto prova të hetuara nga SPAK-u kanë rënduar pozitën e kryebashkiakut, të cilit i është komunikuar dje edhe akuzua e korrupsionit në zgjedhje. Për këtë akuzë, Memolla po hetohet nga prokurori Edvin Kondili.
Më herët, në prill të këtij viti kryebashkiaku është paraqitur në SPAK mbi dyshimet se ka bërë punësime fiktive në bashki, pikërisht në kohën e fushatave elektorale. Dyshohet se ai kishte punësuar persona që nuk jetonin në Shqipëri, por që paguheshin sikur e kryenin punën.
