Durrës: Operacione të vazhdueshme për të luftuar prostitucionin
Në Durrës, Seksioni për Hetimin e Trafiqeve, në bashkëpunim me Seksionin për Mbështetjen Operacionale të Hetimit dhe Prokurorinë, përfundoi operacionin policor të koduar “STORM 8”. Ky operacion erdhi pas një hetimi trejavor me metoda proaktive për veprat penale të “Prostitucionit” dhe “Përshtatjes së ambienteve për prostitucion”.
Gjatë operacionit, në lagjen nr. 13 të Plazhit, u arrestuan në flagrancë dy shtetase kineze, M. Y. (41 vjeç) dhe L. H. (48 vjeç), për aktivitete të lidhura me prostitucionin. Po ashtu, tre shtetas shqiptarë nga Librazhdi, Durrësi dhe Burreli, u proceduan në gjendje të lirë për veprën penale “Prostitucion”, pasi u gjetën në një apartament të marrë me qira nga dy kinezet.
Si pjesë e hetimeve, janë shpallur në kërkim shtetasa kineze J. L. (53 vjeç), për “Përshtatjen e ambienteve për prostitucion”. Autoritetet sekuestruan gjithashtu dy pasaporta të shtetaseve të huaja, një shumë parash në euro dhe lekë, pesë aparate celularë, nëntë karta banke nga bankat kineze dhe një bllok shënimesh.
Shtetaset kineze kishin zgjedhur lokacione strategjike për aktivitetin e tyre, duke marrë me qira apartamente në zonën e Shkëmbit të Kavajës dhe në rrugën “Venecia”. Veprimet hetimore zbuluan se ato kishin pasur arrestime të mëparshme nga shërbimet e DVP Durrës, gjithashtu për të njëjtat akuza.
Të gjitha materialet procedurale janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme hetimore. Ky operacion është pjesë e përpjekjeve të vazhdueshme për të goditur aktivitetet kriminale të prostitucionit në këtë zonë.
