Ish-kampioni i botës në boks, Ricky Hatton, i njohur si “The Hitman”, u gjet i vdekur në banesën e tij në Hyde, Greater Manchester, më 14 shtator. Policia ka konfirmuar se vdekja e tij nuk po trajtohet si e dyshimtë. Në seancën e parë të hetimit në Gjykatën e Koronerit në Stockport, u bë e ditur se shkaku paraprak i vdekjes ishte varja. Hatton kishte qenë parë për herë të fundit nga familjarët më 12 shtator dhe ishte dukur në gjendje të mirë.
Menaxheri i tij, Paul Speak, shkoi në banesën e boksierit dy ditë më vonë për ta dërguar në aeroportin e Manchesterit për një fluturim drejt Dubai, por e gjeti Hatton-in pa ndjenja. Shërbimet e urgjencës u thirrën menjëherë, ndërsa hetimi është pezulluar deri më 20 mars të vitit të ardhshëm.
Djali i tij, Campbell Hatton, ndau në emisionin “Good Morning Britain” disa mendime mbi betejat e të atit me shëndetin mendor. Ai theksoi se familia ishte gjithmonë e hapur për këto tema dhe se kishte parë nga afër vuajtjet e babait, të cilat e kishin ndihmuar edhe në përballjen me problemet e tij.
Ricky Hatton, një figurë e njohur dhe e dashur në botën e boksit britanik, u përcoll për në banesën e fundit javën e kaluar në një ceremoni emocionale. Në këtë ngjarje morën pjesë personalitete të njohura si Liam Gallagher, Tyson Fury, Frank Bruno dhe Tony Bellew, duke treguar influencën dhe respektin që ka pasur ai në botën e sportit.
Ky rast thekson nevojën për të diskutuar hapur mbi shëndetin mendor, një çështje që ka prekur edhe boksierë të njohur, si Hatton, i cili gjatë karrierës së tij ka pasur periudha të vështira.
