Policia ka zbardhur ngjarjen në Berat, ku një vilë 3-katëshe u dogj. Paraprakisht, policia dhe zjarrëfikësit thanë se zjarri ishte i qëllimshëm, për shkak se ambienti ishte spërkatur fillimisht me benzinë.
Por pas hetimeve të mëtejshme, rezultoi se autori i zjarrëvenies së qëllimshme ishte 78-vjeçari me iniciale SH.Q.
Ngjarja dyshohet të ketë ndodhur për motive të dobëta.
I moshuari akuzohet për veprën penale “Shkatërrimi i pronës me zjarr”.
“Berat
I vuri zjarrin gjatë natës, banesës së djalit të tij, për motive të dobëta, procedohet penalisht 78-vjeçari.
Menjëherë pas njoftimit të marrë gjatë natës, se po digjej banesa në pronësi të shtetasit D. Q., në lagjen “30 Vjetori”, shërbimet e Policisë kanë organizuar punën për zbardhjen e rrethanave të rastit, si dhe në bashkëpunim me zjarrfikësit, kanë bërë të mundur shuarjen e zjarrit.
Nga veprimet proceduralo-hetimore të kryera në vendngjarje, është bërë i mundur identifikimi i autorit të këtij rasti, shtetasit Sh. Q., 78 vjeç, i cili dyshohet se i ka vënë zjarrin gjatë natës, banesës së djalit të tij, shtetasit D. Q., për motive të dobëta.
Në përfundim të veprimeve u referuan materialet në Prokurori, ku nisi procedimi në gjendje të lirë për 78-vjeçarin, për veprën penale “Shkatërrimi i pronës me zjarr”.
Materialet hetimore i kaluan Prokurorisë, me qëllim kryerjen e veprimeve të mëtejshme“, njofton policia.
