Pas një hetimi disa-vjeçar nga autoritetet italiane, është goditur një nga rrjetet më të mëdha ndërkombëtare të trafikut të drogës me bazë në Durrës. Drejtuesi i organizatës kriminale është Xhevdet Troplini, i njohur si “Poja”, i cili është i njohur edhe për policinë shqiptare, por që deri tani nuk është shqetësuar nga organet ligjzbatuese shqiptare.
Hetimet e antimafias italiane zbulojnë se Troplini kontrollonte trafikun e drogës përmes nipit të tij Elvis Doci dhe anëtarëve të ngushtë të grupit të tij. Ai dyshohet se ka krijuar një perandori biznesesh në zonën e Hamallajt dhe dyshohet për një marrëdhënie të fshehtë me eksponentë të Partisë Socialiste, ku i sigurohet paprekshmëri në këmbim të votave në favor të kësaj partie.
Në një vendim arrestimi të Gjykatës së Barit të miratuar më 21 shkurt 2025 dhe ekzekutuar në fillim të majit, përmenden si të dyshuar kryesorë Xhevdet Troplini, nipi i tij Elvis Doci dhe biznesmeni Adi Çoba, ky i fundit me lidhje në Itali dhe Durrës.
Raportet mes pjesëtarëve të këtij grupi dhe lidhjet e tyre kriminale janë evidentuar edhe para SPAK-ut në Shqipëri nga bashkëpunëtori i drejtësisë Nuredin Dumani.
Kreu i PD, Sali Berisha, ka akuzuar hapur grupin e Pojës për ndërhyrje në zgjedhjet parlamentare të 11 majit 2025, duke blerë vota dhe intimiduar në favor të Partisë Socialiste.
Vendimi i gjykatës u ekzekutua dy javë pas zgjedhjeve, duke ngritur pikëpyetje mbi vonesën dhe mungesën e ndërhyrjes së organeve ligjzbatuese shqiptare.
