Joe Biden dhe këshilltarët e tij “janë më afër” se kurrë ndarjes me kryeministrin izraelit që nga fillimi i luftës në Gaza. Shefi i Shtëpisë së Bardhë e sheh Netanjahun si “një partner produktiv që mund të ndikohet edhe privatisht”.
Lajmin e bën të ditur Washington Post, duke cituar disa burime, sipas të cilave “zhgënjimi me Netanyahun ka shtyrë disa nga këshilltarët e Bidenit që të bëjnë presion ndaj presidentit që të jetë më kritik në publik për kryeministrin izraelit për operacionin e tij ushtarak në Gaza”. Biden deri më tani nuk ka dhënë shenja për këtë në publik.
Nga ana e tij, kryeministri izraelit mbron presidentin amerikan. “Unë e pashë atë shumë të qartë dhe shumë të fokusuar. Arritëm të biem dakord për objektivat e luftës dhe për shumë gjëra.”
Kështu, kryeministri Benjamin Netanyahu, në një intervistë për ABC Neës, u shpreh për presidentin amerikan Joe Biden.
“Unë e vlerësoj mbështetjen e Presidentit Biden që nga fillimi i luftës. Nuk e di saktësisht” çfarë donte të thoshte kur foli për një operacion të ekzagjeruar. “Por vendoseni veten në vendin e Izraelit, ne u sulmuam. Ne u përgjigjëm në një mënyrë që sulmuam terroristët, mendoj se po bëjmë gjënë e duhur. Ne do të fitojmë, fitorja është e arritshme”, tha Netanyahu në një intervistë për ABC.
Në një fragment nga një intervistë për ABC që do të transmetohet sot, kryeministri izraelit Benjamin Netanyahu kundërshton thirrjet që Izraeli të shmangë ofensivën ushtarake në Rafah: “Ata që thonë se në asnjë rrethanë nuk duhet të hyjmë në Rafah, në thelb na thonë të humbasim luftën. Mbajeni Hamasin atje”, tha ai.
“Ne do të mundim batalionet e mbetura terroriste të Hamasit në Rafah, që është bastioni i fundit”, shtoi Netanyahu.
Qyteti më jugor i Gazës është bërë një strehë për gati një milion palestinezë të zhvendosur në jug nga lufta.
Ushtria izraelite do të sigurojë “kalim të sigurt për popullatën civile” përpara fillimit të operacionit ushtarak në Rafah, shtoi Netanyahu në një intervistë me ABC News në të cilën ai hodhi poshtë frikën e komunitetit ndërkombëtar “për një katastrofë”, duke pasur parasysh praninë e qindra e mijëra palestinezëve të zhvendosur në zonë.
