Hulumtimet e reja zbulojnë se vrimat e zeza në qendrat e galaktikave janë jo vetëm thithëse të materies, por gjithashtu burime të fuqishme erërash kozmike që lëshojnë material në hapësirë. Studimi, i bazuar në vëzhgimet e teleskopit hapësinor eROSITA, sfidon pikëpamjet e mëparshme rreth sjelljes së vrimave të zeza dhe si ato ndikonin në mjedisin përreth.
Vrimat e zeza, veçanërisht ato supermasive në qendrat galaktike, kanë një tërheqje gravitacionale aq të fortë sa as drita nuk mund t’i shpëtojë. Ato absorbojnë vazhdimisht gaz dhe materie, duke krijuar disqe akrecioni para se ky material të bie brenda, rrit masën e vrimës dhe çliron sasi të mëdha energjie që rrezatojnë dritë, kryesisht në formën e rrezeve X, të njohura si kuazare.
Studimet e mëparshme sugjeronin se vrimat e zeza që thithnin materiale me ritme më të shpejta prodhonin rrezatim më të dobët. Megjithatë, hulumtimi i ri e sfidon këtë ide, duke treguar se vrimat e zeza që konsumojnë materie me shpejtësi më të madhe gjenerojnë një rrezatim më të fortë. Dr. Antonis Georgakakis, drejtor i studimit nga Observatori Kombëtar i Athinës, shpjegon se shkëlqimi i rrezeve X rritet në përputhje me shpejtësinë e akumulimit të materies.
Sipas studiuesve, shkrepjet intensive të rrezatimit janë të shkaktuara nga erëra të fuqishme dalëse nga vetë kuazarët, të cilat lëshojnë materie në hapësirë dhe formojnë re që periodikisht “fshehin” burimin e dritës, duke shkaktuar dridhjet në rrezatimin e emetuar.
Ky studim, i kryer nga Observatori Kombëtar i Athinës nën drejtimin e Dr. Georgakakis, është financuar nga Fondacioni Helenik për Kërkim dhe Inovacion (HEL.IDEK) dhe merr në shqyrtim të dhënat e teleskopit hapësinor eROSITA. Observatori dhe institucione të tjera, si Instituti i Astronomisë dhe Astrofizikës, kanë kontribuar në këtë projekt duke ofruar mjete për kalibrimin dhe analizimin e të dhënave.
