Një 17-vjeçar është vënë në pranga nga policia italiane, si autor i dyshuar për vrasjen e 39-vjeçarit shqiptar Bledar Dedja në Itali, ngjarje e ndodhur 1 muaj më parë, datë 20 janar në vendin e quajtur Pieve del Grappa. Dedja u gjet i masakruar me thikë dhe i zhveshur, një detaj që çoi menjëherë hetimet drejt një krimi seksual.
Arrestimi i të miturit inicialet e të cilit nuk mund të zbulohen për shkak të moshës ka ndodhur orët e fundit në provincën e Trevisos dhe çëshjta do të shqyrtohet nga Prokuroria për të Mitur të Venecias, shkruajnë mediat italiane.
Trupi i pajetë i Dedjës u gjet nga një mik i tij, i shtrirë në një pellg gjaku të shkaktuar nga plaga me thikë që i ishte shkaktuar në shpinë dhe që i kishte shpuar mushkëritë. Plagët e tjera ishin kryesisht sipërfaqësore: në tëmthin e djathtë, në krahun e majtë dhe në dorën e djathtë me të cilën kishte arritur të kapte tehun që po e masakronte. Plagë të shumta ka pasur edhe në gjoks.
Ai ishte përdorues i rregullt i aplikacioneve të njohjeve online, që i finalizonte me takime dhe ka pasur pasur njohje me disa gra të tjera. Sipas mediave të vendit fqinj, Dedja përdorte 2 aparate celularë, ku njërin e mbante për takime sekrete erotike.
