Një ngjarje e rëndë ka tronditur futbollin në Qipro, pas ekzekutimit të Stavros Demosthenous, presidentit të klubit Karmiotissa, në një atentat mafioz më 17 tetor në Limasol. 49-vjeçari u qëllua për vdekje nga dy persona të armatosur sapo doli nga banesa e tij. Djali i tij, 18 vjeç, u përpoq ta shpëtonte duke e futur në makinë dhe duke u nisur drejt spitalit, por Demosthenous ndërroi jetë gjatë rrugës.
Klubi Karmiotissa, i regjistruar në kategorinë e dytë të futbollit qipriot, kishte pasur histori të trukimeve të ndeshjeve, duke u hetuar nga UEFA. Megjithatë, Demosthenous kishte marrë drejtimin e klubit vetëm në vitin 2023 dhe nuk ishte president gjatë procedurave të mëparshme hetimore.
Ngjarja ka shkaktuar konfuzion, pasi djali i tij humbi kontrollin mbi automjetin gjatë përpjekjes së shpëtimit, i cili përplasi disa makina në autostradë. Policisë iu raportua se një makinë e djegur ishte gjetur pak minuta pas ngjarjes, duke u dyshuar se ishte përdorur nga autorët për t’u arratisur.
Sipas informacioneve nga autoritetet, sulmi ishte i planifikuar me profesionalizëm; autorët kishin monitoruar lëvizjet e viktimës dhe kishin siguruar eliminimin e tij para se të largoheshin. Hetimet janë përqendruar në lidhjet me botën e basteve dhe trukimet e ndeshjeve, duke kërkuar prova që lidhin këtë ngjarje me aktivitete të dyshimta në futbollin qipriot.
Në vazhdim të hetimeve, policia ka arrestuar tre individë të moshave 58, 39 dhe 30 vjeç, të cilët janë vënë në paraburgim me urdhër të gjykatës. Një tjetër person, i moshës 44 vjeç, është arrestuar gjithashtu dhe ndodhet në paraburgim për tetë ditë. Ky atentat ka ngritur shqetësime serioze rreth sigurisë dhe integritetit të futbollit në Qipro, duke shtuar presionin mbi autoritetet për të zbardhur rastin.
