Vrasja e gjyqtarit Astrit Kalaja në sallë, avokati sjell në kujtesë ngjarjen e plagosjes me armë në Gjykatën e Fierit 18 vite më parë.

Në Gjykatën e Fierit vijon bojkoti i seancave pas vrasjes tragjike të gjyqtarit Astrit Kalaja në Gjykatën e Apelit të Tiranës. Avokati Ervis Goxhaj ka rikujtuar një ngjarje të ngjashme të ndodhur në vitin 2007, kur një person qëlloi me armë gjyqtaren Irena Maneku brenda gjykatës. Kjo ngjarje e rënde për herë të parë solli vendosjen e masave të sigurise si roje dhe detektorë metalesh në gjykatë.

Megjithatë, Goxhaj thekson se edhe sot, e ardhmja e sigurisë për gjyqtarët, prokurorët dhe avokatët mbetet problematike. Ai nënvizon se mbingarkesa e punës dhe mungesa e hapësirave për zhvillimin e proceseve gjyqësore krijojnë rreziqe për sigurinë e magjistratëve. Ai sugjeron se Fierit i nevojitet një godinë e re gjyqësore për të përmirësuar kushtet.

Pas sulmit të 2007-tës, kontrollet në hyrjen e gjykatës u forcuan, por me vetëm pesë salla gjyqi për 21 gjyqtarë dhe një popullsi prej 300,000 banorësh, hapësirat mbeten të papërshtatshme. Goxhaj e përshkruan situatën si një “çmenduri njerëzore” dhe thekson rritjen e agresionit nga qytetarët ndaj sistemit të drejtësisë, që kërkon rritjen e masave të sigurisë.

Reagimi i Gjykatës së Fierit ndaj vrasjes së Kalajës ishte një dëshmi e sulmit ndaj themeleve të shtetit të së drejtës dhe besimit të qytetarëve në ligj dhe drejtësi. Me këtë ngjarje, sistemi gjyqësor përballet me sfida të reja në ruajtjen e sigurisë për ata që punojnë brenda tij.