Arsen Muskurti i ka lënë të habitur hetuesit që e morën në pyetje për vrasjen nga ana e tij të vëllait dhe kunatës. Ai ka rrëfyer se viktimat shkelnin ligjin dhe normat fetare, teksa akuzon Nora Muskurtin për lidhje jashtëmartesore. Autori i krimit të dyfishtë, thotë se është sulmuar nga vëllai Dritani dhe kunata. Pjesë e hetimeve është bërë edhe Antiterrori, për shkak të qëndrimeve të autorit
Babai i 7 fëmijëve dhe bashkëshorti i 3 grave, Arsen Muskurti ka dhënë deklarata të pazakonta përpara hetuesve pas marrjes në pyetje lidhur me vrasjen e dyfishtë në rrugën “Islam Alla”.
Muskurti akuzon familjarët e tij, se përmes agjencisë turistike, që siguronte udhëtimet e besimtarëve drejt vendeve të kultit islam, shkelnin ligjin por edhe normat e fesë. Ai ka deklaruar se kunata e tij, Nora, kishte lidhje jashtëmartesore, fakt që për të është i papranueshëm.
Lidhur me 3 martesat e tij, Muskurti e cilëson normale për sa kohë është pranuar nga bashkëshortja e tij e parë. Sipas autorit të krimit, bashkëjetesa shkonte e qetë dhe pa asnjë problematikë. Për shkak të kësaj tematike, në hetimet për ngjarjen janë përfshirë që në momentet e para, agjentët dhe hetuesit e Antiterrorit, të cilët kanë qenë të pranishëm edhe gjatë marrjes në pyetje.
Autori ka shfaqur gjatë gjithë kohës shenja nervozizmi, paqartësie dhe konfuzioni, ndërsa në lidhje me ngjarjen, nuk ka shprehur një qëndrim nëse është penduar apo jo.
Hetuesit po vëzhgojnë aparatet celulare të viktimave dhe autorit lidhur me kontaktet e tyre, bisedat që mund të kenë kryer me njëri-tjetrin, por edhe për detaje që do të hidhnin dritë mbi ngjarjen.
Policia e Tiranës ka ngritur dy akuza ndaj Arsen Muskurtit, “Vrasja në rrethana cilësuese” kundër dy ose më shumë personave dhe “Mbajtja pa leje dhe prodhimi i armëve. Konfliktet mes vëllezërve për pronën duket se është shkak i ngjarjes.
Çifti i bashkëshortëve Muskurti kanë lënë jetim 3 fëmijë të mitur mes të cilëve një djalë dhe 2 vajza.
Ngjarja e rëndë ndodhi në një zonë të populluar ku u pa nga shumë dëshmitarë të cilët u pyeten nga Policia e Tiranës. Blutë e kryeqytetit e cilësojnë si fundamentalist autorin e krimit, ndërsa tragjedia cilësohet si e paralajmëruar për shkak të statuseve të autorit në rrjetet sociale që hedh akuza të rënda ndaj vëllait dhe kunatës.
