Demokrati Agron Gjekmarkaj ka reaguar ndaj ngjarjes tragjike në Manëz, ku dy të rinj humbën jetën në kushte të dhunshme. Ai shprehu ngushëllimet e tij për familjarët e viktimave dhe theksoi se “koha e lojërave politike me sigurinë e njerëzve duhet të marrë fund”.
Sipas Gjekmarkajt, kjo ngjarje është një dëshmi e rënies së sigurisë publike dhe dështimit të institucioneve përgjegjëse për rendin dhe parandalimin e krimit. Ai e cilësoi situatën si një “kambanë alarmi” për shoqërinë dhe një aktakuzë ndaj Ministrisë së Brendshme dhe Policisë së Shtetit, që sipas tij, janë bërë institucione të paralizuara, të shkëputura nga realiteti që përjetojnë qytetarët.
Në kritikat e tij, Gjekmarkaj theksoi se nuk mund të ketë siguri publike kur ministrja e Brendshme, Albana Koçiu, fokusohet në çështje të tjera, ndërsa drejtori i Policisë, Ilir Proda, është larg përgjegjësive të tij. Ai shkruajti se rezultati i politizimit të institucioneve të rendit është mungesa e vizionit dhe angazhimit për të luftuar krimin, duke sjellë si pasojë aktet tragjike që po ndodhin në vend.
Gjekmarkaj paralajmëroi se kur shteti tërhiqet, krimi avancon dhe se jeta e të rinjve shqiptarë po preket në mënyrën më tragjike, duke e theksuar papunësinë dhe indiferencën e institucioneve.
Ai kërkoi hetim të thelluar, ndëshkim për autorët dhe përgjegjësit institucionalë, duke nënvizuar nevojën që shteti të kthehet në shërbim të qytetarëve. “Koha e lojërave politike me sigurinë e njerëzve duhet të marrë fund”, përfundoi ai.
