TIRANA– Policia e Tiranës ka vënë në pranga një 52-vjeçar të dyshuar për një vjedhje me vlerë të konsiderueshme në një banesë në rrugën “Musa Agolli”. Në pranga ka rënë shtetasi Pashk Zefi, i cili akuzohet se ka marrë 1 000 000 lekë dhe sende me vlerë rreth 20 000 euro nga kasaforta e banesës. Ndërkohë, policia ka shpallur në kërkim bashkëpunëtorin e tij, i cili dyshohet se e ka ndihmuar 52-vjeçarin të largohej nga vendngjarja me automjet.
Hetimet paraprake tregojnë se dy autorët kishin vëzhguar më parë zonën dhe kanë përfituar nga mungesa e banorëve në momentin e ngjarjes.
NJOFTIMI I POLICISË:
Tiranë/Finalizohet operacioni policor i koduar “Rojtaret”.
Vodhi 1 000 000 lekë dhe sende me vlerë 20 000 euro, në kasafortën e një banese në rrugën “Musa Agolli”, identifikohet, lokalizohet dhe kapet 52-vjeçari.
Shpallet në kërkim shtetasi që largoi 52-vjeçarin, me automjet, nga vendngjarja.
2 bashkëpunëtorët kanë mbajtur në vëzhgim zonën dhe kanë hyrë në banesë, kur aty nuk kishte banorë.
Sekuestrohen 2 automjete, 1 celular dhe 1 armë zjarri pistoletë me leje, gjatë kontrollit të banesës të 52-vjeçarit.
Pas kallëzimit të një shtetaseje, se më datë 24.10.2025, nga kasaforta në banesën e saj, ishin vjedhur gjatë kohës që nuk kishte patur banorë, 1 000 000 lekë dhe sende me vlerë 20 000 euro, shërbimet e Komisariatit të Policisë Nr. 4 organizuan punën për kapjen e autorit/ëve.
Si rezultat i veprimeve të shpejta hetimore dhe operacionale, të kryera në kuadër të operacionit “Rojtaret”, u mundësua identifikimi i të dy shtetasve të implikuar në këtë rast, konkretisht P. Z., 52 vjeç dhe D. B., 56 vjeç, të banues në Tiranë. 52-vjeçari u vu në pranga, ndërsa shtetasi D. B. u shpall në kërkim.
Nga këto veprime dyshohet se 2 shtetasit kanë mbajtur në vëzhgim banesën në rrugën “Musa Agolli”, ku shtetasi P. Z. ka hyrë për të vjedhur, kur nuk ka patur banorë. Ndërkaq, shtetasi D. B. ka larguar me automjet, 52-vjeçarin, nga banesa, pasi ky i fundit dyshohet se vodhi nga kasaforta, 1 000 000 lekë dhe sende me vlerë 20 000 euro.
Vijojnë kërkimet për kapjen e shtetasit D. B.
Gjithashtu, vijojnë hetime për të zbardhur vjedhje të tjera që mund të kenë kryer këta shtetas.
Materialet procedurale iu referuan Prokurorisë së Tiranës, për veprime të metejshme.
