Nga ura e Mifolit në Novoselë të Vlorës, kreu i Emergjencave Civile, Haki Çako, ka dhënë një përditësim mbi situatën e krijuar nga reshjet e dendura të ditëve të fundit dhe daljet e lumenjve në disa zona. Ai njoftoi se strukturat e emergjencave janë në gatishmëri të plotë, pasi situata mbetet e paqëndrueshme.
Në lidhje me lumin Vjosë, Çako theksoi se ka pasur një ulje të nivelit të tij gjatë orëve të fundit, duke e bërë situatën më të menaxhueshme. Megjithatë, disa zona të tjera, si veriu (Lezhë dhe Shkodër) dhe juglindja (Devoll), janë përballur me dëmtime të argjinaturave dhe përmbytje të tokave bujqësore. Ai konfirmoi ndërhyrjet paraprake në fshatin Çukë të Sarandës, duke theksuar se pas tërheqjes së ujit do të nevojiten përmirësime për argjinaturën.
Çako informoi se reshjet e ardhshme pritet të jenë më pak intensive për shkak të uljes së temperaturave, ndërsa procesi i verifikimit të dëmeve në terren do të fillojë pas përmirësimit të kushteve. Ai theksoi se, për disa ditë, vendi është përballur me mot të keq, me probleme evidente në zona të ndryshme, dhe ekipet e emergjencave po punojnë për të minimizuar pasojat e situatës.
Situata do të monitorohet me vëmendje, në mënyrë që të merret çdo masë e nevojshme.
