Një rast grabitjeje në Muzeun e Luvrit u zgjidh falë gjetjes së një gjurme ADN-je, e cila çoi në arrestimin e dy të dyshuarve të shtunën në mbrëmje. Sipas informacionit nga BFMTV, njëri prej dyshuarve u identifikua me një “gjurmë vendimtare ADN-je” që u gjet në vendngjarje.
Policia mjeko-ligjore ka qenë në kërkim të çdo prove të mundshme që prej ngjarjes, duke mbledhur më shumë se 150 mostra ADN-je, gjurmë gishtash dhe prova të tjera. Perrine Rogiez-Thubert, shefja e policisë mjeko-ligjore, sqaroi se hetuesit kanë analizuar gjurmë të ndryshme, si gjak, pështymë dhe objekte të tjera që mund të kenë prekur autorët, duke përfshirë një helmetë, një radio dore, një jelek të verdhë dhe dy rrota prerëse metalesh.
Hetimi mori përshpejtim pas një tentative arratia nga një nga të dyshuarit, i cili u arrestua pas identifikimit përmes testimeve të ADN-së. Të dy burrat, rreth 30 vjeç dhe banorë të Aubervilliers, një zonë periferike e Parisit, konsiderohen “të dyshuarit kryesorë” në rastin në fjalë. Njëri prej tyre ka shtetësi franceze dhe algjeriane, e u kap në aeroportin Roissy–Charles de Gaulle, teksa po përgatitej të udhëtonte drejt Algjerisë, ndërsa tjetri është vetëm shtetas francez.
Aktualisht, policia vazhdon hetimet për të zbuluar se kush janë bashkëpunëtorët e tyre dhe për të gjetur plaçkën e grabitur, e cila mbetet ende e pagjetur. Ky rast ka tërhequr vëmendjen e mediave dhe opinionit publik, duke e quajtur një prej grabitjeve më të rëndësishme të kohëve të fundit. Hetimet po vazhdojnë me fokus në analizimin e provave dhe identifikimin e të tjerëve të përfshirë në këtë ngjarje të rëndësishme.
