TIRANË– Kryeministrja e Italisë, Giorgia Meloni ka mbërritur ditën e sotme në Shqipëri ku e shoqëruar nga homologu i saj shqiptar, Edi Rama do të inspektojë më nga afër qendrat e pritjes së emigrantëve në Shëngjin dhe Gjadër. Këto qendra po ndërtohen në kuadër të marrëveshjes së firmosur nga Rama dhe Meloni më 6 nëntor të 2023.
Me ardhjen e kreut të qeverisë italiane janë publikuar edhe pamjet e para nga këto kampe. Siç shihet në foto e mëposhtme, gardhi metalik disa metra i gjatë ka rrethuar zonën ku do të qëndrojnë refugjatët afrikanë.
Në qendrën pritëse në Shëngjin do mbahet pas inspektimit edhe konferenca e dy liderëve qeveritarë. Në kuadër të masave për të garantuar sigurinë dhe mbarëvajtjen e aktivitetit kanë mbërritur në portin e Shëngjinit edhe oficerë të policisë italiane.
Sipas marrëveshjes porti i zbarkimit të emigrantëve do të jetë Shëngjini, ku do të ngrihet qendra e parë që do të shërbejë për identifikimin dhe regjistrimin e refugjatëve, ndërsa Gjadri do të jetë kampi për vendqëndrimin e tyre në pritje të përgjigjeve për kërkesat e azilit. Qendra pritëse do të ketë një kapacitet 3 mijë vende, dhe siç parashikon pakti atje do t’u duhet të presin vendimet nëse mund të shkelin ose jo në territorin italian ose, në të kundërt do të riatdhesohen me shpenzimet e Romës.
Ndërkohë mediat italiane raportojnë se vlera e projektit parashikohet të jetë rreth 34 milionë euro. Vlerë kjo të cilës duhet t’i shtohen rimbursimet për shërbimet e transportit, shërbimet komunale, grumbullimin e mbetjeve, mirëmbajtjen e zakonshme dhe të jashtëzakonshme, lidhjen Wi-Fi dhe kujdesin shëndetësor. Megjithatë pakti i nënshkruar mes dy vendeve ka shkaktuar reagime të ashpra si nga opozita shqiptare ashtu dhe nga opozita italiane, pasi sipas tyre kjo marrëveshje shkel të drejtat e njeriut.
