VLORA- “Master AL” në Vlorë është subjekti tregtar i goditur nga policia i cili dyshohet se rihidhte në treg produkte të skaduara, duke u falsifikuar etiketat, duke vënë kështu në rrezik shëndetin e qytetarëve. Bazuar në pamjet e shpërndara nga policia, vërehet se produktet e skaduara përfshinin brioshë, fruta të thata, fara, pije dhe hurma arabie.
Bëhet me dije se gjatë operacionit u sekuestruan në cilësinë e prova materiale 716 koli dhe kilogramë me mallra ushqimorë të përpunuara që kishin afatin e skadencës në janar dhe shkurt 2025 dhe afati i skadencës ishte falsifikuar me qëllim rihedhjen në treg për shitje.
Lidhur me këtë rast janë arrestuar Florenc Domi administrator i subjektit tregtar dhe Agim Domi magazinier pranë subjektit si dhe janë proceduar penalisht ortaku dhe shoferi i magazinës.
