Tullumbace dhe duartrokitje për udhëtimin e fundit të Klajdi Bitrit, 23 vjeç, i vrarë të dielën rreth orës 17:00 në Sirolo (Ankona) nga 27-vjeçari algjerian Fatah Melloul, tashmë në burg.
Familjarë, miq dhe të njohur e shoqëruan arkivolin nga morgu i spitalit në portin e Ankonës.
Trupi mbërrin sot me tragetin e Adria Ferries në Shqipëri ku dhe do të prehet përgjithmonë i riu shqiptar.
Në rreshtin e parë, vëllai i Klajdit, Xhuliano, më pas miqtë e tij, si dhe dhjetëra, anëtarë të komunitetit shqiptar dhe shokë të ekipit të futbollit Aquila. Ata parakalojnë në portin e Ankonës dhe artikulojnë një fjalë të vetme: “Drejtësi, drejtësi, drejtësi”.
Arkivoli mbërriti në port në orën 16.15, të ditës së djeshme ndërsa njerëzit tashmë ishin zhvendosur në Harkun e Trajanit në Ankoname tullumbace dhe lule për të përshëndetur mbërritjen e tij.
Kortezhi mortor zemërthyer u nis nga spitali Torrette deri në portin ku u hipën arkivoli për në Shqipëri.
Duartrokitjet nisën që jashtë morgut të Torrette. Ky ishte rrugëtimi i fundit i Klajdi Bitrit drejt Shqipërisë. Babai i tij bëri thirrje një ditë pas ngjarjes për ndihmë që trupi i të birit të kthehej në vendlindje.
Dhe fundi i këtij rrugëtimi është vendlindja Lushnja, ku dhe do të prehet sot. 23-vjeçari u vra të dielën në Sirolo nga një shtizë në gjoks pas një sherri banal ku u përfshinë 27-vjeçari algjerian Fatah Melloul që qëlloi me pushkë peshkimi të riun shqiptar dhe disa miq të shqiptarit.
