Një aksident tragjik ka ndodhur në ishullin e Sardenjës në Itali, ku një 25-vjeçar ka humbur jetën. Ngjarja zhvillohet kur makina me pesë të rinj doli nga rruga për arsye ende të paqarte dhe ra nga një urë rreth 15 metra e thellë në qytetin Tempio Pausania.
Tragjedia merr një dimension të veçantë, pasi babai i viktimës, një zjarrfikës lokal, ishte ndër të parët që arritën në vendngjarje për të ofruar ndihmën e parë, pa e ditur që i biri ishte aty. Shoferi i automjetit, që ka arritur të dalë nga makina, ka vrapuar për ndihmë drejt një shtëpie afër, pasi në zonë nuk kishte sinjal telefonik.
Zjarrfikësit u përballën me kushte të vështira për të arritur në automjet dhe për të nxjerrë personat e bllokuar brenda, për shkak të terrenit të pjerrët dhe të errët. Katër të rinjtë e tjerë u plagosën dhe janë transportuar menjëherë në spitalin lokal.
Autoritetet italiane kanë nisur hetimet për të përcaktuar shkaqet e këtij aksidenti tragjik, i cili ka tronditur komunitetin e Sardenjës dhe ka sjellë dhimbje për familjarët e viktimave.
