Tajfuni Kajiki ka shkaktuar tragjedi në Vietnam, duke vrarë së paku tre persona dhe plagosur dhjetë të tjerë, sipas informacionit të dhënë nga autoritetet të martën. Situata ka ardhur si rezultat i shirave të fuqishëm, që kanë ngritur alarmin për përmbytje dhe rrëshqitje toke në rajone të ndryshme të vendit.
Për pasojë, stuhia ka shkatërruar afërsisht 7,000 shtëpi dhe ka shkaktuar përmbytje në rreth 28,800 hektarë fushash orizi. Po ashtu, janë rrëzuar rreth 18,000 pemë, duke përfshirë 331 shtylla të energjisë, gjë që e ka penguar furnizimin me elektricitet në provincat Thanh Hoa, Nghe An, Ha Tinh, Thai Nguyen dhe Phu Tho.
Rrugët e kryeqytetit Hanoi janë mbushur me ujë, duke e bërë të pamundur qarkullimin normal të automjeteve. Video të transmetuara nga mediat tregojnë makina të zhytura deri në çati. Ujërat e përmbytjeve kanë rrethuar edhe zona të populluara, pikërisht në një moment kur qyteti po përgatitet për paradën në nder të 80-vjetorit të themelimit të shtetit.
Meteologët raportuan se nivelin e Liqenit Perëndimor ka arritur pikën kritike për shkak të reshjeve të vazhdueshme, madje disa fshatra në provincën Bac Ninh janë izoluar për shkak të përmbytjeve. Pjesët veriore të Vietnamit pritet të kenë më shumë reshje, me parashikime që flasin për deri në 150 milimetra shi brenda gjashtë orëve, gjë që mund të shkaktojë përmbytje të menjëhershme dhe rrëshqitje toke.
Tajfuni Kajiki goditi bregdetin veri-qendror të Vietnamit të hënën pasdite dhe më pas, ndërsa po lëvizte drejt Laosit, u dobësua në një stuhi tropikale. Para se të arrinte në Vietnam, stuhia e goditi gjithashtu bregdetin jugor të ishullit Hainan të Kinës, duke detyruar mbylljen e bizneseve dhe transportit publik në qytetin e Sanyas.
Si rezultat i kësaj situate të rrezikshme, më shumë se 586,000 persona janë evakuuar nga bregdeti qendror i Vietnamit dhe është ndaluar udhëtimi detar.
