Dy nga katër amerikanët e rrëmbyer me armë në Meksikë javën e kaluar kanë vdekur, ndërsa dy të tjerë janë ende gjallë, ka thënë një guvernator i shtetit meksikan të Tamaulipas.
Katër shtetas amerikanë u rrëmbyen me armë në 3 mars teksa po udhëtonin drejt qytetit Matamoros për një operacion estetik. Sipas të afërmve të tyre, të cilët kanë folur për mediat amerikane, një nga personat kishte takim me mjekun ditën që u rrëmbye.
Zyra e Prokurorit të Përgjithshëm të Meksikës konfirmoi se nga katër amerikanët “dy prej tyre janë të vdekur, një person është plagosur dhe tjetri është gjallë”, tha guvernatori i Tamaulipas, Americo Villarreal, gjatë një konference për shtyp.
Katër amerikanët hynë në qytetin kufitar të Matamoros, Meksikë, nga Brownsville, Teksas, me një furgon të bardhë me targa të Karolinës së Veriut të premten kur persona të armatosur filluan të qëllonin mbi automjetin e tyre, tha FBI. Më pas, personat e armatosur i futën amerikanët në një automjet tjetër dhe i larguan.
Gjatë episodit, “një qytetar i pafajshëm meksikan” u vra, sipas Ken Salazar, ambasadorit të SHBA në Meksikë. Ai tha të hënën se agjenci të shumta të zbatimit të ligjit në SHBA po punonin me autoritetet meksikane për të gjetur dhe shpëtuar amerikanët e zhdukur. Qeveria amerikane ofron 50,000 dollarë për informacion.
