TIRANË- Besimtarët myslimanë festojnë sot Kurban Bajramin. Mëngjesin e sotëm qindra besimtarë myslimanë u mblodhën në bulevardin “Dëshmorët e Kombit” në Tiranë për faljen e namazit të Kurban Bajramit. Ceremonia nisi në orën 06:15.
Siç shihet edhe nga pamjet e publikuara bulevardi u mbush me besimtarë të shumtë. Në videon e publikuar nga Komuniteti mysliman i Shqipërisë duken besimtarët të cilën janë krah njëri tjetrit në këtë festë të rëndësishme. Prania e besimtarëve është e lartë sa gjithë bulevardi është mbushur më njerëz.
Kurbani është festa e ngjalljes së shpresës dhe e optimizmit për të vazhduar me këmbëngulje besnikërinë ndaj Zotit të gjithësisë, se ai është Falës i Madh, Mëshirues i Pakufijshëm”. Kurbani paraqet materializimin e nijetit dhe të gatishmërisë, që në emër të Allahut të flijohet. Përveç aspektit shpirtëror të kurbanit, është i rëndësishëm edhe aspekti social i tij, ndihma për atë që nuk ka, në mënyrë që të gjithë së bashku të festojnë këtë festë islame.
