Një gol spektakolar nga mbrojtësi Micky van de Ven ka bërë jehonë në median sociale pas fitores së Tottenham mbi Copenhagen në Ligën e Kampionëve. Holandezi, me një shpejtësi të jashtëzakonshme, nisi aksionin nga zona e tij mbrojtëse, duke kaluar katër lojtarë të kundërshtarit dhe përfundoi me një goditje të saktë që çoi rezultatin në 3-0 për “Spurs”.
Goli i Van de Ven e kujton supergolin e Son Heung-min ndaj Burnley në vitin 2019, me të cilin sulmuesi korean fitoi çmimin “Puskas”. Pas ndeshjes, Van de Ven tha: “E pashë një hapësirë përpara dhe thashë ‘pse jo?’, ndjeva se mund të vazhdoja pa u ndalur.” Ky gol ishte i gjashti për të në këtë sezon, pas një paraqitjeje të shkëlqyer nën drejtimin e trajnerit Thomas Frank.
Ndeshja pati një fillim dramatik, me Brennan Johnson që zhbllokoi rezultatin në minutën e 19-të, por më pas u përjashtua me karton të kuq pas një ndërhyrjeje të ashpër, të cilën VAR-i e rishikoi. Edhe me një lojtar më pak, Tottenham tregoi forcë, me Odobert që shënoi golin e dytë dhe më pas mrekullinë e Van de Ven. Palhinha vulosi fitoren me golin e katërt.
Në minutat shtesë, Richarlison pati mundësinë për të shënuar edhe të pestin, por goditja e tij nga pika e penalltisë u ndal në traversë. Megjithatë, ky dështim nuk e prish natën e madhe të Tottenham, e cila do të mbahet mend për golin e mrekullueshëm që tashmë ka krijuar pritshmëri për çmimin “Puskas Award 2025”.
