Një ngjarje e frikshme ndodhi gjatë një safari në Sri Lanka, ku një elefant rreth tre tonë sulmoi një minifurgon me turistë. Sipas raportimeve, kafsha e egër u hodh mbi automjet, duke e lëkundur fort dhe ngritur dy rrota nga toka. Elefanti më pas përdori trungun e tij për të shqyer derën e mjetit dhe hyri brenda, në kërkim të ushqimit. Një turiste ruse kishte ofruar fruta elefantit më herët, të cilat besohet se bënë që ai të reagonte në mënyrë agresive.
Dy anëtarë të familjes që ndodhej në automjet u larguan me vrap për të shpëtuar. Situata u qetësua vetëm pasi një tjetër automjet turistik iu afrua dhe bëri zhurmë me borin. Pavarësisht dëmeve të mëdha, duke përfshirë derën e shkulur, turistët arritën të largohet të padëmtuar. Turistja ruse, Liliya Mikhailovskaya, 43 vjeçe, shprehu shqetësimin se ajo dhe familja e saj “pothuajse humbën jetën” gjatë këtij incidenti.
Ngjarja ndodhi në një park kombëtar, ndërsa vendasit paralajmërojnë se sulmet e tilla nga kafshët e egra janë të zakonshme. Kjo situatë vjen disa ditë pas një tjetër alarmi në Indi, ku një elefant i egër shkaktoi panik masiv në shtetin Jharkhand, duke vrarë të paktën 22 persona. Autoritetet indiane janë angazhuar në kapjen dhe qetësimin e kësaj kafshe, e cila dyshohet të ndodhet në një periudhë agresive të çiftëzimit, të njohur si musth.
Kjo ngjarje nxjerr në pah rreziqet që lidhen me afrimin e turistëve me kafshët e egra në ambiente natyrore dhe rëndësinë e respektimit të distancave të sigurta dhe sjelljeve në kontaktin me ta.
