Në orët e para të mëngjesit sot është nisur nga porti i Qipros për në Gazë anija me 200 ton ushqim.
Anija e organizatës bamirësisë Open Arms u pa duke lundruar nga porti i Larnakas në Qipro, duke tërhequr një maune që përmbante miell, oriz dhe proteina për banorët e Gazës.
Anija i përket një shoqate bamirësie spanjolle me të njëjtin emër. Nuk dihet ende saktësisht se ku planifikon të ankorohet anija kur të arrijë në Gaza, shkruan BBC.
Misioni, i financuar kryesisht nga Emiratet e Bashkuara Arabe, po organizohet nga organizata bamirëse me bazë në SHBA World Central Kitchen (WCK), ndërsa shoqata bamirëse spanjolle furnizon anijen.
“Qëllimi ynë është të krijojmë një ‘autostradë’ detare me varka dhe maune të pajisura me miliona vakte të vazhdueshme drejt Gazës”, thanë themeluesi WCK Jose Andres dhe shefi ekzekutiv Erin Gore në një deklaratë.
Nisma është e ndarë nga një plan i SHBA-së për të ndërtuar dhe operuar një platformë lundruese pranë bregut të Gazës, e cila do të lejojë dërgimin e shpejtë të ndihmave humanitare.
Organizatat bamirëse synojnë të marrin ndihma direkt në Gaza, e cila është izoluar nga bota e jashtme që kur Izraeli filloi ofensivën e tij në përgjigje të një sulmi të 7 tetorit ndaj Izraelit nga Hamasi.
