Ish-kryeministri Sali Berisha ngriti sot dyshime të forta për një lidhje mes korruptimit që sipas tij Edi Rama i bëri ish-drejtuesit të FBI-së dhe shpalljes së tij non grata. Kryetari i PD-së kishte disa fjalë edhe për rolin e ambasadores Yuri Kim.
“Hetimi do të jetë kompleks. Oligarku Deripaska ka arritur deri në statusin e investitorit strategjik në Shqipëri. Kjo është e vërteta. Gjithçka do të hetohet. Ne nuk heqim dorë. Lidhur me zonjën Kim. Dihet botërisht qëndrimi im ndaj saj dhe i saji ndaj meje.
Nuk mund të them se cili është roli i saj në aferën Rama-McGonigal, i takon drejtësisë së SHBA-së që të bëjë hetimin. Ka vetëm një deklaratë, nëse ju kujtohet i jam përgjigjur flakë për flakë. Në një intervistë ajo shprehet se “ka bërë hetime edhe FBI”.
Ajo tha atë që DASH nuk e ka thënë kurrë. Dhe tani që del lobimi McGonigal, tani e di ajo nëse e përdori për të mbuluar gënjeshtrat e veta që i ka bërë qeverisë së vet për mua, e përdor si mburojë apo cfarë është, unë ia lë drejtësisë së SHBA-së” tha ai.
