Angel Di Maria ka hedhur prapakrahëqve dëmtimin dhe është gati të rikthehet protagonist me Juventusin dhe Argjentinën, me këtë të fundit për të bërë sa më mirë që kombëtarja të arrijë trofeun e “Katar 2022”.
Në një intervistë të gjatë për dokumentarin “Sean Eternos: Campeones de America” të përgatitur nga Netflix, argjentinasi ka shpërthyer në lot si asnjëherë më parë në një TV, teksa është bërë nostalgjik për golin e shënuar në “Maracana” të Rio de Zhaneiro kundër Brazilit, një gol që në vitin 2021 i dha kombëtares argjentinase Kupën e Amerikës.
“Është e vështirë, shumë vite vuajtje dhe në fund të kesh sukses. Nuk është vetëm trofeu im, ai i përket edhe gruas sime, vajzave të mia, ekipit dhe babait tim. Unë kam mijëra trofe, por si ky…, nuk ka të tillë. Mendoj se kjo ishte e vetmja gjë që doja”. Britma e kujtesës për atë 10 korrik 2021 në “Maracana”, shtëpinë e brazilianëve shoqërohet me lotë në sytë e Di Maria.
