Katër persona janë vënë në pranga nga Policia e Tiranës dhe një tjetër është shpallur në kërkim, pasi dyshohet se kanë dhunuar dhe kanosur dy bashkëpronarë të një sipërfaqe toke në zonën e Rrugës së Elbasanit në kryeqytet, me pretendimin se prona u përkiste atyre.
Sipas policisë, ngjarja u zbardh pas kallëzimit të shtetasve L.H. dhe A.C., të cilët deklaruan se pesë shtetas i kishin sulmuar fizikisht dhe verbalisht, me qëllim për t’i detyruar të lëshonin pronësinë mbi një sipërfaqe toke që ata e kishin blerë në vitin 2021.
Menjëherë pas kallëzimit, Sektori për Hetimin e Krimeve të Rënda, në bashkëpunim me Forcën e Posaçme Operacionale, finalizoi operacionin e koduar “Pretendimi”, duke vënë në pranga shtetasit: Erald Allushi, 28 vjeç; Erald Balla, 31 vjeç; Ervin Topi, 42 vjeç; Ardian Shera, 44 vjeç.
Ndërkohë, është shpallur në kërkim shtetasi Emiljano Topi, 37 vjeç, i cili dyshohet të jetë personi që pretendon pronësinë mbi tokën në fjalë. Të gjithë të përfshirët janë banues në fshatin Nikël, Krujë dhe njihet se kanë lidhje shoqërore me njëri-tjetrin.
Policia po vijon punën për kapjen e 37-vjeçarit dhe për dokumentimin e plotë të rrethanave të ngjarjes. Ndaj tyre është ngritur akuza për veprën penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.
Materialet procedurale janë referuar Prokurorisë së Tiranës për veprime të mëtejshme.
