TIRANË- Kryedemokrati Sali Berisha ka publikuar në konferencën e sotme për mediat pamje që tregojnë aplikimin e fenomenit të njohur si “Treni bullgar” dhe mbushjen e kutive të votimit. Berisha tha se pamjet janë marrë nga kamerat regjistruese në qendrat e votimit, të cilat sipas tij, faktojnë alegjitimitetin e plotë të procesit zgjedhor. Ai shtoi më tej se këto video të publikuara janë fytyra e vërtetë e procesit të votimit që u zhvillua më 11 maj.
“Këtu sot para jush kam sjellë disa zbulime që janë bërë përmes studimit të kamerave regjistruese në qendrat e votimit, të cilat faktojnë alegjitimitetin e plotë të procesit zgjedhor, shëmtinë e kësaj farse të paparë. Ftoj qytetarët t’i ndjekin një nga një. Unë kam zgjedhur 6 video nga 60, 600, 6000 që mund të paraqisja sot në këtë sallë. Ky është komisioner, ky tani do kontrollojë votën.
Merr fletën e votimit, tani shoku komisioner e shoqëron në dhomën e errët, pasi ai duhet të sigurohet për votën e tij. Ka kontroll më policesk dhe më të poshtër të votës se sa ky? Komisionari kriminel, pasi kreu misionin, kthehet në karrigen e detyrës. Tani këtu kemi moment tjetër. Merr dy fletë votimi. Shikojeni. Ky me dy është lule, po ka me katër.Një, dy, pra me dy fletë votimi. Është paguar dy herë. Ka marrë dyfishin.
Tani, prapë Treni Bullgar këtu. Vazhdo i thotë ky tjetri këtu. Bën sikur e fsheh, tani e nxjerr përsëri jashtë. Ja! Ky sjell fletë votimi nga jashtë. Shikojeni! Pra, ai është votues profesionist. Plotëson katër fletë aty pa ID, pa asgjë. Të gjithë këta mbrohen nga Altin Troplini dhe banda e tij. Tani një, dy fletë votimi. Ky është fytyra e vërtetë e votimit të 11 Majit.”, tha Berisha.
