Pas mesazhit të urimit me të cilin përfaqësia e Shteteve të Bashkuara të Amerikës në Shqipëri uroi popullin shqiptar për zgjedhjet e 11 majit, deputeti i PD, Belind Këlliçi, në një intervistë për Syri TV, ka reaguar ashpër, duke e cilësuar qëndrimin zyrtar si një “tallje”.
Këlliçi ka shkuar edhe më tej, duke e etiketuar Ambasadën Amerikane si “memece”, pasi sipas tij, ky lloj mesazhi nuk do t’i përshtatej as vendeve të botës së tretë.
Një ndryshim i menjëhershëm toni, pas një “muaji mjalti” fiktiv mes PD-së dhe SHBA-së që pas zgjedhjeve në SHBA. Një periudhë në të cilën mbështetësit e Berishës i kanë ushqyer vetes dhe të tjerëve iluzione, duke pretenduar se përmes lobimeve të kushtueshme mund të ndikonin në ndryshimin e kursit amerikan ndaj tyre.
Shpërthimi i Këlliçit është edhe një manifestim i paaftësisë për të pranuar pozicionin e qartë dhe të pandryshueshëm të SHBA-së në raport me Shqipërinë – një vend partner – por mbi të gjitha në raport me Sali Berishën. Pavarësisht shumave të mëdha të shpenzuara nga burime të panjohura, SHBA vijon ta konsiderojë Berishën “non grata”.
Kjo qasje përbën një kthim pas për PD-në e drejtuar de facto nga Berisha, duke rikthyer në skenë retorikën e viteve kur ai sulmonte Departamentin e Shtetit dhe pretendonte se ishte viktimë e George Soros. Por sot, me një administratë të re dhe konservatore në SHBA, alibitë e tyre bien një e nga një. Sepse në Amerikë mund të ketë ndryshuar shumëçka – përveç një gjëje: vlerësimi i tyre për Sali Berishën si “të padëshiruarin e madh” të një vendi mik. VIDEO:
