Jehona e fitores kundër Çekisë ndihet akoma, por tashmë kuqezinjtë po bëhen gati për sfidën e radhës, atë ndaj Bullgarisë të martën, që do të luhet në “Air Albania” në orën 18:00. Natyrisht, do të ketë rotacion në radhët e Kombëtares, duke filluar nga porta me Strakoshën në vend të Berishës.
Nga formacioni startues ndaj Cekisë, vetëm Mitaj dhe Cikalleshi priten ta nisin si titullarë. Qendra e mbrojtjes me shumë mundësi do të jetë me dyshen Veseli-Mihaj, ndërsa Balliu djathtas e Mitaj majtas. Ndryshon e gjithë mesfusha, me Gjasulën, Lacin dhe Mucin në rolin e fantazistit. Ndërsa sulmi me Uzunin në të majtë, Muja djathtas dhe Cikalleshi në qendër.
Trajneri Silvinjo la pushim futbollistët të shtunën, ndërsa do të ketë edhe dy seanca stërvitore deri ditën e ndeshjes me Bullgarinë. Ndonëse miqësore, në kampin kuqezi vlerësimi është maksimal, madje bëhet thirrje për mbështetje nga tifozët.
Kjo do të jetë miqësorja e parë për Silvinjon, i cili deri më tani ka zhvilluar 6 ndeshje zyrtare, duke marrë 4 fitore, 1 barazim dhe një humbje.
Sfida e radhës vlen për pikë në renditjen e FIFA-s, por edhe për të mbajtur lart moralin. Shanset janë për një fitore, ndaj një Bullgarie në kohët e veta më të vështira, që nuk ka fituar asnjë ndeshje në eliminatoret e Euro2024-s, duke grumbulluar vetëm 3 pikë me 3 barazime.
