Një skemë e financuar me 4.3 milionë paund nga qeveria britanike, e cila synonte të kthente qindra kriminelë shqiptarë për të vuajtur dënimin në vendlindje, ka rezultuar një dështim spektakolar. Deri më tani, vetëm tetë të dënuar janë transferuar nga Mbretëria e Bashkuar në Shqipëri, pavarësisht pritshmërive që numri të ishte mbi 200, ndërsa 1200 të tjerë mbeten ende në burgjet britanike.
Sipas një raportimi të gazetës britanike “Daily Mail”, marrëveshja e transferimit të të burgosurve, e nënshkruar mes dy qeverive, është bllokuar nga burokracia dhe mbingarkesa e gjykatave shqiptare. Në këtë kuadër, autoritetet e Tiranës kërkojnë një rishqyrtim të dënimeve të dhëna nga gjykatat britanike para se të pranojnë transferimin e të burgosurve.
Kush janë tetë të dënuarit e deportuar?
Mes tetë shqiptarëve të dëbuar, përfshihen individë të dënuar për vrasje, trafik droge dhe përdhunim. Disa nga më të spikaturit në këtë listë janë:
Klodjan Copja (30 vjeç) – drejtues i një rrjeti furnizimi me kokainë me vlerë 60 milionë paund në MB.
Erald Mema (40 vjeç) – shef bande droge, i dënuar me 25 vjet burg.
Gentjan Dervishaj (33 vjeç) – organizator i trafikut të 11 milionë paund drogë.
Elion Gllava (29 vjeç) & Andon Bita (49 vjeç) – të përfshirë në një përplasje me armë në Oldham, ku u qëllua një person.
Dardan Dollapaj (25 vjeç) – i dënuar për tentativë vrasjeje me thikë në Londër.
Rufat Kasamaj (38 vjeç) – i dënuar me 10 vite e gjysmë burg për përdhunimin e një 15-vjeçareje në një qendër tregtare.
Dolimar Sejdiu (24 vjeç) – i dënuar për lëndime të rënda trupore dhe plagosje.
Një kosto marramendëse për Britaninë
Sipas raportit të “Daily Mail”, për secilin nga tetë kriminelët e deportuar, Britania ka shpenzuar mesatarisht 537,500 paund, një shumë që përfshin përmirësimet në burgjet shqiptare, blerjen e flotës së transportit të të burgosurve dhe shpenzimet operative të skemës.
Nga marrëveshja e miratuar në vitin 2023, Britania priste të largonte të gjithë të dënuarit shqiptarë me mbi katër vjet burg. Megjithatë, procesi është bllokuar për 59 kriminelë që ende ndodhen në burgjet britanike, në pritje të një vendimi nga gjykatat shqiptare.
Ndërkohë, një burim i sistemit të drejtësisë në Shqipëri pranoi për “Daily Mail” se procesi është duke u zvarritur për shkak të një “numri të madh dosjesh të prapambetura” në sistemin gjyqësor shqiptar.
A do të funksionojë kjo marrëveshje?
Dështimi për të realizuar këtë marrëveshje ka shkaktuar polemika në të dyja vendet. Britania e Madhe kërkon përshpejtimin e procedurave, ndërsa autoritetet shqiptare insistojnë në shqyrtimin individual të çdo dosjeje. Nëse ky ritëm i ngadaltë vazhdon, marrëveshja mund të rishikohet ose madje të anulohet.
Për momentin, qindra shqiptarë të dënuar në Mbretërinë e Bashkuar vazhdojnë të qëndrojnë në burgjet britanike, duke krijuar një barrë të madhe financiare për taksapaguesit dhe duke ngritur pikëpyetje mbi efektivitetin e kësaj marrëveshjeje të shumëpërfolur.
