Prej afro katër dekadash, Vera Jaupaj, një 55-vjeçare nga Patosi, ka ndihmuar në transformimin e hekurit në art dhe funksionalitet. Ajo është një nga gratë e pakta në Shqipëri që ushtrojnë profesionin e saldatorit, duke kontribuar në sektorin e naftës, një nga industri më të rëndësishme të vendit.
Pasioni për saldimin e shoqëroi Verën që në moshë të re. Pas përfundimit të shkollës profesionale në Kuçovë, në moshën 16-vjeçare, ajo filloi punën në një ndërmarrje që prodhonte pajisje për industrinë e naftës, sektor që kërkonte profesionalizëm dhe përgjegjshmëri të lartë. Vera kujton se, në klasën e saj të shkollës profesionale, ishin 32 djem dhe vetëm dy vajza. Pas përfundimit të studimeve, ajo u emërua në Ndërmarrjen e Agregateve në Patos, ku, me ndihmën e kolegëve, arriti të rrisë nivelin e saj të profesionalizmit dhe të kryejë punë me përgjegjësi të rëndësishme.
Tashmë, me mbi 38 vite eksperiencë, Vera vazhdon të ushtrojë me përkushtim profesionin e saj, duke sfiduar paragjykimet e zakonshme për një zanat që tradicionalisht konsiderohet mashkullor. Në një kohë kur shumë të rinj po e braktisin këtë profesion, ajo bën një thirrje për ta: “Të rinjtë duhet të mësojnë dhe të ushtrojnë profesionin e saldatorit. Sot ka shumë kërkesë në treg dhe mundësitë e punësimit janë të mëdha,” thotë ajo.
Historia e Verës është një shembull frymëzues për forcën dhe përkushtimin e saj, duke treguar rëndësinë që kanë profesionet teknike për zhvillimin e industrisë dhe ekonomisë së Shqipërisë. Me këtë angazhim, ajo gjithëashtu përfaqëson një model për të rinjtë, duke treguar se profesionet teknike janë gjithmonë të rëndësishme dhe me mundësi të mëdha punësimi.
