Gjykata Supreme e Spanjës ka miratuar një vendim të rëndësishëm që forcon kuadrin ligjor kundër dhunës me bazë gjinore, duke përcaktuar se çdo kontakt fizik me përmbajtje seksuale pa pëlqim konsiderohet sulm seksual dhe jo thjesht ngacmim. Ky vendim erdhi në përfundim të një rasti ku një burrë u shpall fajtor për sjellje të papërshtatshme ndaj një gruaje në një stacion autobusi, ku ai kishte kapur dorën e saj, e kishte puthur dhe kishte bërë oferta për t’a shoqëruar në këmbim të parave.
Mbrojtja e të pandehurit kërkoi rikualifikimin e veprës penale si “ngacmim në rrugë”, por ky argument u hodh poshtë nga gjykata. Trupa gjykuese e theksoi se veprimet e tilla përbëjnë një shkelje të drejtpërdrejtë të integritetit dhe lirisë seksuale të viktimës, duke kaluar përtej një gjesti të thjeshtë. Në arsyetimin e saj, gjykata nënvizoi se kontakti fizik i padëshiruar dhe me qëllim seksual është një imponim mbi vullnetin e viktimës dhe se ky akt ishte një sjellje me përmbajtje të qartë seksuale që zvogëlon viktimën në një objekt.
Dënimi ndaj të pandehurit u la në fuqi, duke i caktuar një gjobë prej 1,620 eurosh. Ky vendim është parë si një hap i rëndësishëm në interpretimin e ligjit mbi pëlqimin dhe kufijtë personalë, në një vend që ka promovuar politikën kundër dhunës ndaj grave për shumë vite. Që nga viti 2004, Spanja ka miratuar disa nga ligjet më të avancuara në Evropë për mbrojtjen nga dhuna me bazë gjinore, duke vazhduar të forcojë kuadrin ligjor në këtë fushë. Kjo përpjekje shpall angazhimin e Spanjës për të luftuar dhunën ndaj grave dhe për të mbështetur viktimat e saj.
