Fondi Monetar Ndërkombëtar (FMN) ka publikuar një raport të detajuar mbi gjendjen e ekonomisë shqiptare, duke u fokusuar në sektorë të ndryshëm, përfshirë kreditë për banesa dhe tregun e punës. Gjatë vizitës së fundit në Shqipëri, FMN-ka theksuar rëndësinë e monitorimit të kontratave të Partneriteteve Publike dhe Private (PPP), duke kërkuar një kujdes më të madh nga ana e autoriteteve shqiptare.
Sipas FMN, “monitorimi i rregullt i huadhënies në vend, PPP-ve dhe subjekteve jashtë bilancit mbetet kritik”, duke nënvizuar nevojën për standarde më të forta në zbulimin dhe qeverisjen e fondeve publike. Përsa i përket tregut të banesave, FMN sugjeron zgjatjen e kufizimeve mbi huat, si dhe diversifikimin e ofertave për punë me cilësi më të lartë për të mbajtur fuqinë punëtore në vend.
Raporti njofton gjithashtu se sistemi bankar shqiptar është i kapitalizuar mirë, likuid dhe fitimprurës, megjithatë identifikon disa dobësi të lidhura me ekspozimin e lartë të bankave ndaj huamarrësve dhe huadhënieve valutore. Rritja e shpejtë e huadhënies për pasuri të paluajtshme paraqet një rrezik potencial dhe kërkon monitorim të kujdesshëm.
FMN rekomandon rritjen e produktivitetit të firmave dhe krijimin e mundësive të punës me cilësi të lartë. Reformat duhet të fokusohen në përmirësimin e klimës së biznesit, uljen e burokracisë, promovimin e investimeve në kërkimin dhe zhvillimin si edhe miratimin e teknologjive të reja.
Pavarësisht përparimeve në realizimin e reformave dhe integrimin në institucionet europiane, FMN evidenton disa boshllëqe që lidhen me zbatimin e politikave. Fondi e inkurajon Shqipërinë të marrë masa të mëtanishme për të përshpejtuar avancimin drejt Bashkimit Evropian.
