Kryetari i Bashkisë së Tiranës, Erion Veliaj, ka depozituar në Gjykatën Kushtetuese kundërshtimet ndaj prapësimeve të Prokurorisë së Posaçme lidhur me masën e sigurimit ndaj tij. Mbrojtja ligjore e Veliajt argumenton se prokuroria ka shtruar çështje që cënojnë parimet e shtetit ligjor dhe funksionimin e institucioneve demokratike.
Prokuroria pretendon se autoriteti i zgjedhur dhe legjitim i Veliajt përbën një rrezik për hetimin, duke thënë se ai krijon presion mbi vartësit. Ekipi juridik i Veliajt e shikon këtë si një sulm ndaj demokracisë, duke argumentuar se legjitimiteti demokratik i përfaqësuesve të zgjedhur duhet të mbrohet dhe jo të përdoret si justifikim për masa ndëshkuese.
Një tjetër pikë e kontestuar është se Veliaj po ushtron të drejtat e tij kushtetuese përmes një padie administrative për verifikimin e mandatit të prokurorit, e cila për prokurorinë përbën një sulm ndaj hetimit dhe justifikon vazhdimin e paraburgimit. Mbrojtja e Veliajt thekson se kjo logjikë e cila ndalon aksesin në gjykatë përbën një rrezik për lirinë dhe të drejtat e qytetarëve.
Po ashtu, prokuroria ka akuzuar Veliajn për përpjekje për të krijuar një konflikt institucional, ndërsa ai argumenton se si kryetar i Bashkisë, ka të drejtë të kërkojë verifikimin e ligjshmërisë së mandatit të prokurorit. Sipas mbrojtjes, ndalimi i Veliajt ka pasur pasoja të drejtpërdrejta në funksionimin e Bashkisë, duke prekur shërbimet për qytetarët.
Nuk janë aspak të bazuara pretendentet se paraburgimi pa afat është i ligjshëm, veçanërisht sepse ai skadon çdo standard proporcionaliteti, sipas Komisionit të Venecias për të zgjedhurit vendorë.
Mbrojtja e Veliajt kërkon që Gjykata Kushtetuese të vlerësojë nëse masa ndaj tij është një sigurim i nevojshëm apo krijon një precedent negativ për standardet kushtetuese dhe për funksionimin e demokracisë.
