Në një atmosferë të mbushur me dhimbje dhe lotë, familja, miq dhe të afërm i dhanë lamtumirën e fundit Flavio Saraçit, 19-vjeçarit shqiptar, i cili humbi jetën në banesën e tij në Itali në rrethana ende të paqarta. Ceremonia mortore u zhvillua në provincën e Pistoias, ku Flavio jetonte me familjen e tij në Masotti, zonë e Serravalle Pistoiese.
Trupi i tij u zbulua nga vëllai i tij 10-vjeçar, i cili e pa të rrëzuar në dhomën e gjumit dhe nuk arriti ta shpëtonte. Raporti mjekësor konfirmon se Flavio ka ndërruar jetë nga një arrest kardiak. Ai ishte student në Institutin Pacini dhe, sipas informacioneve, nuk kishte pasur probleme shëndetësore. Njohësit e tij e përshkruajnë si një djalë aktiv dhe në formë të mirë fizike, duke u angazhuar në sporte të ndryshme.
Ngjarja ka tronditur komunitetin lokal dhe ka ngritur pyetje mbi shkaqet që çuan në këtë tragjedi të papritur. Flavio ishte një djalë i ri me të ardhme të ndritur, dhe humbja e tij është ndjerë thellë nga të gjithë ata që e njohën.
