Ka ndërruar jetë në moshën 47-vjeçare Dorian Kongoli, djali i njohur i shkrimtarit Fatos Kongoli. Ai jetonte dhe punonte në New York për mbi 25 vjet, ku kishte ndërtuar një jetë të plotë dhe një karrierë të suksesshme në radhët e policisë amerikane.
Dorian Kongoli kishte një angazhim të fortë në letërsi dhe kishte publikuar disa vepra nën pseudonimin Dorian Keys, përfshirë romane si “Imprint Legacy” (2019), “Morning Star” (2020) dhe “Yesterday’s Tomorrow: Big Brother Has Evolved” (2022). Ndërsa në gjuhën shqipe, deri tani vetëm një roman i tij, “Transplanti i jetës”, është botuar nga shtëpia botuese Toena në vitin 2020.
Të afërmit e tij, në një mesazh të ndarë, shprehin hidhërimin për humbjen e Dorianit, duke vënë në dukje se ai ishte një njeri i dashur dhe i lakmuar. Ata gjithashtu njoftuan se është në proces botimi dhe romani i tij i fundit “E ardhmja e së djeshmes: Vëllai i Madh ka ndryshuar pamje.”
Dorian Kongoli do të mbetet në kujtesë për ndihmesën e tij në letërsi dhe për kontributin e tij në shërbimin publik. Shpirti i tij pushoftë në paqen e përjetshme.
