Një aksident tragjik i ka marrë jetën një çifti të rinjsh në Itali, ndërkohë që një i afërm i tyre ka mbetur i plagosur. Dy 23-vjeçarët, Francesco Giovinazzo dhe Gessica Muià, humbën jetën menjëherë në vendin e aksidentit, teksa makina me të cilën ata po udhëtonin u përplas me një shtyllë betoni, pasi kishin festuar ditëlindjen e të resë.
Të tre po udhëtonin përgjatë një rruge në qendër të qytetit, kur për arsye ende nën hetim, ata goditën shtyllën me makinën e tyre. Njëra nga viktimat, vajza, ishte personi që sapo kishte festuar ditëlindjen, ndërkohë që drejtuesi i mjetit nuk kishte patentë.
I riu tjetër që ndodhej në makinë dhe mbeti i plagosur është 20 vjeç. Sipas Tgcom, gjendja e të plagosurit është shumë e rëndë.
Në momentin e aksidentit, tre të rinjtë sapo kishin dalë nga një klub ku së bashku me miqtë e tjerë kishin festuar ditëlindjen e Gessica Muià.
Prokuroria Publike e Palmit, e cila koordinon hetimet për aksidentin, ka urdhëruar kryerjen e analizave të alkoolit dhe toksikologjike në trupat e dy viktimave dhe të të riut të tretë. Më tej, nga hetimet e kryera nga policia rezultoi se makina e përfshirë në aksident ishte e pasiguruar.
