Autoritetet shëndetësore në Greqi janë alarmuar pas zbulimit të lidhjes mes një dhuruesi danez sperme dhe dhjetëra rasteve të kancerit tek fëmijët të lindur përmes fekondimit artificial. Nga analiza të fundit, është zbuluar se 18 fëmijë në Greqi kanë lindur nga materiali gjenetik i këtij dhuruesi, disa përfshirë dhe fëmijë në të njëjtën familje, duke tejkaluar limitet e lejuara nga ligji.
Një mjek, në një intervistë televizive, raportoi se një fëmijë i moshës 5 deri 10 vjeçare ka humbur jetën nga kanceri, duke qenë gjithashtu i lindur nga sperma e dhuruesit. Fëmija ishte pjesë e një familjeje me tre fëmijë nga e njëjta linjë dhurimi, dhe tragjedia vazhdon pasi një tjetër anëtar i këtij grupi është diagnostikuar me kancer dhe është nën trajtim.
Pas analizave shkencore, u zbulua se këta fëmijë mbartnin një mutacion të rrallë në gjenin TP53, i cili rrit ndjeshëm rrezikun e formave agresive të kancerit në fëmijëri. Ky mutacion nuk ishte identifikuar gjatë kontrollit të fillimit që iu bë dhuruesit, pasi ai ishte i pranishëm vetëm në disa spermatozoide.
Rasti duket se është më i gjerë se sa thjesht në Greqi. Ky dhurues ka kontribuar në lindjen e të paktën 197 fëmijëve në 14 vende të Europës përmes klinikave të fertilitetit, me 77 prej tyre të testuar, 25 prej të cilëve rezultojnë mbartës të mutacionit dhe disa nga ata kanë vdekur në moshë të re.
Ekspertët e shëndetësisë theksojnë se ky është një dështim i thellë i sistemit, duke përfshirë mungesë koordinimi ndërmjet vendeve të Bashkimit Europian, ligje të ndryshme për dhurimin dhe një industri me mbikëqyrje të dobët. Incidenti ka nxjerrë në pah nevojën për një mekanizëm të përbashkët të kontrollit për të siguruar mbrojtjen e fëmijëve dhe familjeve, duke mos e lënë këtë çështje në dorë të tregut.
