Në kulmin e sezonit turistik, kryetari i bashkisë Himarë, Vangjel Tavo, ka ndërmarrë një iniciativë të kontestuar për të gjobitur turistët, në përpjekje për të menaxhuar parkimin dhe bllokimet e rrugëve në zonë. Ndërsa përballet me çmime të larta, mungesë plazhesh publike dhe mbetje që përhapen në çdo cep, Tavo e ka bërë publike këtë masë përmes rrjeteve sociale, duke arsyetuar se është një mënyrë për të rivendosur rendin. Ai ka theksuar se parkimi në vende të palejuara ka shkaktuar bllokime të trafikut, duke vështirësuar lëvizjen brenda qytetit.
Megjithatë, Tavo duhet të përgjigjet për sa vende parkimi ofron bashkia që udhëheq, duke nxjerrë në pah një mungesë infrastrukture. Në fundjavë, kur numri i turistëve është më i madh, ai ka vendosur të zbatojë këto gjoba masive, përkundër faktit se mund të kishte përdorur policinë për të zhbllokuar rrugët.
Këtë vit, numri i turistëve në Himarë ka pësuar një rënie të dukshme, shumë larg pritshmërive, dhe sipas analistëve, këtë e ka shkaktuar rritja e çmimeve dhe cilësia e dobët e shërbimeve. Kryeministri Edi Rama e ka promovuar turizmin si një nga sukseset më të mëdha të qeverisë, por veprimet e kryebashkiakëve, të cilët shpesh duken të paaftë, rrezikojnë të minojnë edhe më shumë këtë sektor të rëndësishëm.
