SARANDË- Prej dy ditësh familja Dhimaku po jeton me dhimbjen e humbjes së dy vajzave të tyre të reja pas aksidentit tragjik të regjistruar në aksin Sarandë-Delvinë. Të afërmit e Elvisa dhe Rozina Dhimakut me lot në sy kanë shpjeguar se vajzat punonin dy punë për shërimin e vëllait të tyre.
Sipas hallës së vajzave, Elvisa dhe Rozina pasi janë kthyer nga puna e parë janë bërë gati e kanë dalë për të shkuar te puna tjetër në Sarandë ku shisnin misra. Ajo theksoi se 30 minuta pasi dolën nga shtëpia morën lajmin e keq të aksidentit.
“Jetojmë në këtë dhimbje kaq të madhe. 2 çupat ikën nuk kthehen më. Në mbrëmje kishin ardhur nga puna, bënin 2 punë për shërimin e vëllait se s’kishin mundësi. Erdhën pushuan dhe u nisën prapë për punë. Në Sarandë shisnin misra dhe gjëra të fshatit. Ato ikën, dhimbjen e kemi”, tha halla.
Ajo shtoi se djalit 7-vjeçar ende nuk i kanë treguar së dy motrat janë ndarë nga jeta. Ai është larguar nga shtëpia. Halla më tej ka bërë apel për të gjithë shqiptarët për ndihmë për kurimin e e djalit të vogël.
“Kanë vëllanë e vetëm, ai ishte shumë i lidhur me to, po ta marrë vesh…e kemi larguar nga shtëpia. Sadopak kërkojmë ndihmë që djali të shkojë në një spital më të specializuar që të na shpëtojë”, shprehet Shahidja, halla e vajzave mes lotësh”, shtoi halla.
Edhe xhaxhai i vajzave iu bashkua apelit për ndihmë për të ndihmuar djalin e mitur. Ai u shpreh se kanë luftuar me sëmundjen e djalit me sa mundësi kanë patur dhe theksoi se në momentin që ai do të marrë vesh për ngjarjen e rëndë do të përkeqësohet.
“Jetoj në emigrim. Kjo që na ndodhi mos i ndodhtë askujt, as hasmit, ndihmë kërkojë dhe për djalin se vajti 3 vjet me këto probleme, ka sëmundje gjaku. Kemi luftuar me forcat tona kaq sa kemi pasur mundësi. Djali është 7 vjeç. Në momentin që do e marrë vesh, menjëherë do përkeqësohet gjendja e tij”, shprehet xhaxhai i vajzave Vasil Dhimaku.
“2 yje dy vajza, 22 vjeçe 20 vjeçe, të dyja studente në Tiranë. Prindërit punëtorë në fshat, punonin natë-ditë për ato vajza ti sistemojnë, të studionin. Kërkojnë ndihmë për çunin, zoti të na ndihmojë. Djali nuk di gjë për motrat”,shtoi daja i vajzave.
