Peqini, i njohur për cilësinë e vajit të ullirit, po përballet me një krizë të rëndë mungese tregu. Qindra ton vaj ulliri qëndrojnë të pa shitur në depot e fermerëve, duke rrezikuar ekonominë e shumë familjeve që varen nga kjo kulturë bujqësore.
Pavarësisht prodhimit të suksesshëm dhe cilësisë së lartë gjatë këtij viti, fermerët e Peqinit shprehin shqetësime për shitjet e vajit të ullirit, i cili është i rëndësishëm për ekonominë lokale. Ata theksojnë se nuk po gjejnë blerës për produktet e tyre dhe kërkojnë ndihmë për të krijuar një pikë grumbullimi, së bashku me mbështetje nga shteti. Sipas fermerëve, eksporti i vajit nga vendet fqinje po krijon një konkurrencë të ashpër.
Një nga faktorët kryesorë që ndikon në situatën e vështirë është kostoja e lartë e punës, duke filluar nga kujdesi për ullinjtë, vjelja dhe procesi i përpunimit në fabrikë. Kjo ka bërë që shitja e vajit të ullirit të jetë e pamundur me çmime nën kosto. Për fermerët e kësaj zone, vaj hija e ullirit është më shumë se një kulturë bujqësore; ajo përbën themelin e ekzistencës së qytetit dhe fshatrave përreth.
Me situatën aktuale të tregut, nevojitet një plan i menjëhershëm për të mbështetur fermerët dhe për të siguruar që prodhimi i tyre të ketë një rrugëdalje të qëndrueshme. Nëse nuk merren masa të shpejta, pasojat për ekonominë lokale do të jenë të rënda dhe shumë familje do të përballen me vështirësi të mëdha financiare. Fermerët kërkojnë zgjidhje dhe një bashkëpunim më të ngushtë me institucionet përkatëse për ta kaluar këtë situatë krizë.
