Po mbahet me dyer të mbyllura mbledhja e Këshillit të Mandateve për të shqyrtuar kërkesën e SPAK për heqjen e imunitetit deputetes Belinda Balluku. Gazetari i Top Channel, Muhamed Veliu, raporton se deri tani në mbledhje ka folur vetëm Niko Peleshi, i cili ka lexuar relacionin, ndërsa prokurorët e SPAK, përfshirë kreun Klodian Braho, nuk kanë marrë ende fjalën.
Anëtari i PD, Gazment Bradhi, ka sugjeruar që mbledhja të jetë me dyer të hapura, propozim i cili është kundërshtuar nga Taulant Balla. Gjatë diskutimeve, demokratët kanë shprehur dëshirën për të shqyrtuar provat në një USB, por Balla ka insistuar që ato të shikohen vetëm brenda mbledhjes. Prokurori ka kërkuar hapjen e USB-së për të njohur anëtarët e Këshillit me provat, ndërsa avokati mbrojtës i Ballukut ka theksuar se kjo është e nevojshme për të ndërtuar mbrojtjen e tij.
Mësohet se në USB përfshihen rreth 10.000 faqe prova. Megjithatë, ende nuk është vendosur se si do të trajtohen këto dokumente. Avokati i Ballukut ka kërkuar një afat prej tri javësh për të shqyrtuar materialin, ndërsa prokurori ka deklaruar se pesë ditë janë të mjaftueshme për njohjen me aktet.
Diskutimi i provave dhe afateve ka shkaktuar tensione gjatë mbledhjes, dhe vendimi për heqjen e imunitetit të Ballukut mbetet ende në pritje. Proçesi po zhvillohet në një atmosferë të ngarkuar, me debate mbi mënyrën e trajtimit të provave, duke theksuar rëndësinë e transparencës dhe të drejtësisë në këtë çështje të ndjeshme.
